Новы фільм Філа Грабскi распавядае пра ўваскрасенне Хрыста – самую значную падзею ў гісторыі хрысціянскай цывілізацыі – праз вобразы сусветнага мастацтва. Гісторыі пакут і ўваскрашэння Хрыста былі прысвечаны шэдэўры Леанарда, Мікеланджэла, Эль Грэка і Караваджа, пра яе працягвалі і працягваюць разважаць мастакі, сярод якіх нашы сучаснікі – Марк Уолiнгер і Сэм Тэйлар-Вуд.

Апошнія 2000 гадоў гісторыя жыцця, смерці і ўваскрашэння Хрыста была вызначальнай для ўсёй заходняй цывілізацыі. Вестка пра ўваскрашэнне з’яўлялася не толькі евангельскім аповядам, але і найважнейшай тэмай у еўрапейскім мастацтве. Эмацыянальны водгук, трыумф веры, апавяданне – усё гэта прысутнічала на карцінах і фрэсках. У фільме «Уваскрашэнне ў мастацтве» у аб’ектыве аказваюцца творы ад раннехрысціянскіх часоў і да нашых дзён, якія расказваюць нашу агульную гісторыю. Здымкі фільма праходзілі ў Ерусаліме, па ўсёй Еўропе і ў ЗША.